Nan yon nòt pou laprès pati politik Platfòm Nouvèl Ayiti (PNA) mete deyò jounen madi 20 Septanm 2022 a, nan kad selebrasyon jounen nesans Anprè Jean Jacques Dessalines, yon premye tan, estrikti politik la desann byen ba pou l salye memwa gwo potorik gason sa a, Jean Jacques Dessalines ki te batay pou akouche libète pou premye fwa sou bout tè ki rele Ayiti a. Epi nan yon dezyèm tan, pozisyone l sou kriz sosyo-politik ak ekonomik peyi a ap konnen depi yon bon bout tan.

“Platfòm Nouvèl Ayiti (PNA) wete chapo l byen ba pou l salye memwa papa nasyon an Jean Jacques Dessalines. Nan dat sila a yon gason kanson ki kwè nan mounite e ki te envante libète pou moun nwa te di lavi bonjou”, se konsa PNA koumanse nòt li a.

Pi lwen, pati politik la kwè jounen 20 Sektanm sa ta dwe yon jounen refleksyon. Yon kote, yo dwe reflechi sou ideyal desalinyen an ki pa t lòt bgy ke fòk tout pèp ki sou ti bout tè sa a viv lib e libè. Yon lòt kote, Pati a ap fè konnen l ap seye reflechi sou reyalite dyabolik peyi a ap konnen jounen jodi an.

” Kidnapin, gang k ap feraye, konplisite otorite ak gang yo, koripsyon k ap taye banda nan prèske tout nivo nan administrasyon piblik la, enjerans etranjè, enkonpetans, inondasyon menm aprè yon ti farinay lapli, esklizyon majorite an, pwostitisyon jèn gason ak fanm, grangou, lavi chè, rate gaz, ayisyen k ap kouri kite Peyi a nan nenpòt kondisyon pou gade kote lavi ap souri ba yo ak imilyasyon frè n ak sè n ap pran lòt bò dlo, sa yo se reyalite pèp ayisyen ap viv chak jou”, se sa PNA pouswiv pou l esplike nan kominike li a.

Pati a fini nòt pou laprès sa a pou l kondane epi denonse konplisite otorite pa bò isit ki mare sosis yo ak yon ti gwoup enpòtan nan kominote entènasyonal ki lakoz pwòp pitit peyi a ap kokobe nan mizè ak kras. PNA di l kanpe tòf ap batay bò kote pèp la pandan l ankouraje tout konpatriyòt konsekan fè menm jan ak li, “kanpe goumen”. Paske li kwè li posib pou tout pitit natif natal peyi sa a viv ak diyite nan peyi yo ak kè poze Jan ideyal papa nasyon an, Jean Jacques Dessalines, te vle e te goumen pou sa.

Se Frantz Mackenzie LAINÉ, Sekretè Jeneral Platfòm Nouvèl Ayiti (PNA) ki siyen nòt sila a.

Hamilton FRANÇOIS

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook