Byen bonè maten lendi 19 Sektanm 2022 a, sou antènn Radyo Televizyon Karayb, ansyen senatè Nò e ansyen kandida pou pòs prezidan peyi dAyiti, Moïse Jean Charles te entèveni pou reponn aktyèl sekretè Jeneral Nasyonzini an, Antonio Guterrez , ak britalite aprè sòti l te fè sou kriz k ap brase bil peyi dAyiti a, epi mande popilasyon an kontinye mobilizasyon an.

Nan yon “Twit”, sekretè Jeneral Nasyonzini fè nan lide pou l reyaji sou kriz sosyo-politik k ap brase bil peyi a nan denyè moman sa yo sitou sòti pèp Ayisyen an fè aprè PM defakto a, Ariel Henry ak akolit li yo te fin monte pri gaz la plis pase 100%, nan ponp yo. Li fè konnen moun ki nan lari k ap manifeste yo se gwoup gang yo ki anvayi peyi a. Yon deklarasyon newochirijyen Ariel Henry repete po pou po nan denyè mesaj li voye bay nasyon an yèswa dimanch lan, kote li pa sispann ensilte e menm enève pèp ayisyen an.

Pou Moïse Jean Charles, deklarasyon Antonio Guterrez la se yon manke dega, se yon derespektan kont pèp souvren an ki leve kanpe pou defann dwa yo. Nan sans sa a, ansyen senatè repiblik la mande pou popilasyon an pa lage mobilizasyon an yon may paske sekretè Jeneral nasyonzini an manke l dega, lè l trete l de gang.

N ap raple yon lòt kote nan entèvyou a, li envite pèp la kontinye mobilizasyon paske se sèl nan mobilizasyon yo ka dechouke Ariel Henry nan tèt peyi a. Anplis, dirijan Pitit Dessalines nan mande, PM nan prese prese pou l mete kle Primati a anba pòt la epi kite pouvwa a. Paske se Ariel Henry ki reprezante kominote entènasyonal ki pa janm sispann foure de pye devan yo nan sa k ap pase lòt peyi. E toutotan li nan tèt Primati a, pèp la ap toujou nan grangou; dwa yo ap toujou pa respekte; y ap toujou paka voye pitit yo lekòl, elt.

Hamilton FRANÇOIS

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook