Nan yon nòt pou laprès selil kominikasyon lapolis nasyonal mete deyò jounen Samdi 17 sektanm 2022, li anonse Direktè Jeneral Polis Nasyonal la, Frantz Elbé, dirije yè Vandredi a nan aprè midi yon reyinyon avèk anpil wo grade enstitisyon sila a ki sòti nan divès inite gran kò a tankou DDO1 ak DDO2, SWAT, BRI, CIMO, UDMO, CBIM, BLTS, BLVV ak POLIFRONT. Rankont sa òganize nan lide pou otorite polisyè yo evalye epi wè kòman yo ka amelyore yon plan sekirite pou retabli lòd nan peyi a, sitou nan kad mouvman pwotestasyon yo”, se sa nou ka li nan nòt enstitisyon pibliye sou paj Facebook ak Twitter li.

Yon rankont kote direktè Jeneral pou yon ti bout tan Lapolis la, Frantz Elbé, fè mizopwen sou plizyè entèvansyon twoup li yo fè nan kad dénye soulèvman popilè nan prèske tout vil nan peyi a men sitou nan zòn metwopolitèn Pòtoprens lan. Yon seri entèvansyon, daprè Elbé, Lapolis la fè nan objektif pou l anpeche pwotestatè yo kraze ak piye antrepriz sitwayen yo nan divès komin.

Nan menm lide sa a, daprè menm nòt sa a, ajan polisye yo arete anviwon yon trantèn moun pou piyaj ak destriksyon byen piblik ak prive.

Konsa, “lapolis ap dwe kontinye mete an esplikasyon tout sa lalwa mande ak sa lalwa ba l kòm zouti pou anpeche endividi mal entansyone kenbe peyi a nan dezole jeneralize, se sa fòs lòd yo ekri nan nòt sila a.

Anplis, “toujou daprè nòt sa a, enstriksyon pase bay tout jiridiksyon Polis yo pou kontinye akonpanye teknisyen Ministè Travo Piblik yo pou debloke wout yo pou pèmèt sikilasyon machin reprann, sa ki ap pèmèt popilasyon nan katye yo jwenn dlo ak manje nan peryòd difisil sa a”, pouswiv nòt la.

N ap raple denyè semèn sa yo se pa de denonse yo denonse zak maspinay lapolis ap fè sou moun swa ki nan manifestasyon kont monte pri gaz la oubyen sitwayen pezib k ap chache lavi nan lari a. De denyè egzanp yo, se jèn gason 21 lane sa a, ki se dezyèm loreya nasyonal nan egzamen bakaloreya, lapolis ta tiye epi boule menm kote a epi dam sa a, lapolis ta tiye sou wout Delma a epi kouvri l anba fatra malgre yo konnen l pa mouri.

Hamilton FRANÇOIS

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook