Nan yon nòt tout louvri ansanm ak yon videyo k ap sikile sou paj Facebook enstitisyon Polis Nasyonal la, jounen jodi lendi 12 Septanm 2022, lapolis mande tout moun k ap manifeste ak moun k ap òganize manifestasyon pou yo respekte limit lalwa defini pandan y ap revandike Dwa manman lwa peyi a ba yo.

Denyè tan sa yo, peyi a boulvèse anpil anpil. Pèp la sanble vle mete pye l atè pou tout bon pou l di l bouke, li pa kapab ankò, li pa dakò ak jan moun yo rele otorite isit yo ap mennen bak peyi a. Anplis kriz gaz k ap brase bil peyi a, ou jwenn lavi chè k ap egzajere chak jou pi plis. Sitiyasyon sa yo jwenn ak yon banm lòt tankou ensekirite a parèt konplike pou lapolis la jere daprè konsta anpil moun fè.

Nan sans sa a, Lapolis Nasyonal mande pou pou tout moun k ap manifeste ak òganizatè manifestasyon yo espesylaman pou respekte limit lalwa defini nan sa ki gen pou wè ak mouvman pwotestasyon k ap fèt nan lari yo.

Nan nòt sila a, fòs lòd yo di yo rekonèt dwa tout moun genyen pou yo fè tande vwa yo, men lapolis la p ap tolere okenn atak sou lavi moun ni zak briganday ak latwoublay sou byen moun ak byen Leta.

N ap raple denyè tan sa yo, anpil moun deplore ak kondane zak maspinay Lapolis ta fè sou moun nan manifestasyon. Pi mal, ta sanble fòs lòd yo tiye de chofè moto semèn ki sot pase a nan zòn kafou tifou.

Hamilton FRANÇOIS

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook