Majistra komin Dèlma a pa kache fristrasyon l lè l konstate kòman DINEPA (Direksyon Dlo Pòtab ak Asenisman) kraze kèk wout li di ki fin konstui ak fèb mwayen meri nan komin sila a. Nan yon video ki pibliye sou paj “Facebook” meri Dèlma a, Majistra a pa met baboukèt nan bouch li pou l degaje fristrasyon l sou aksyon sa a yo.

“Se avèk pèn ak mizè ke m ap viv deblozay DINEPA a nan kraze wout nan komin Dèlma a. Fè wout ak kanivo se pa yon bagay ki fasil avèk sak siman ki koute plis ke 1 000 goud”, sa a se youn nan pawòl fristrasyon Majistra Wilson Jeudy.

Pi lwen, premye sitwayen komin Dèlma a mande pou DINEPA refè wout li kraze yo. Anplis li mande pou lòt antite yo kolabore avè l, sitou EDH (Elektrisite an Ayiti).

Yon lòt kote, Majistra Dèlma a pa mete dlo nan diven l pou l di aksyon dinepa yo se mechanste yo ye. “Sa ap rache kè m lè m gade kantite sakrifis ki fèt ak kantite kòb ki depanse apre pou m se nan eta sa a yo koupe wout la. M ap mande èske se yon konplo DINEPA ap fè pou chak wout mwen fè pou yo kraze l. Se sa m oblije esplike moun yo, paske sa a se yon mechanste li ye”, se pawòl Majistra komin Dèlma a nan yon videyo ki parèt sou paj Facebook meri komin sila a.

Se pa sèlman DINEPA Majistra a touche, li pa neglije tire boulèt Kanno sou EDH. “Pandan m’ ap di sa a DINEPA li menm li kraze, men EDH pa fè anyen menm. Pa gen yon kote w ap fè yon travay pou w rele EDH vin ranje yon poto pou ou pou l vini”, se konsa Majistra a te kontinye diskou l nan videyo sila a kote li pa neglije montre imaj yon bann wout li di DINEPA kraze.

Majistra Wilson Jeudy mande DINEPA ak EDH pou yo kolabore avè l pito olye y ap kraze. N ap raple pou tout moun, se kòb taks chak grenn sitwayen ki pèmèt travay yo rive fèt.

Bernado TINTIN

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook