Nan yon nòt pou laprès ki pibliye Jodi lendi 15 dawou a, manm estrikti politik ki pote non “Nou dwe viv” la pa mete baboukèt nan bouch yo pou fè santi fristrasyon k ap travèse yo nan jan sitiyasyon peyi a ap plonje pi fon sou lagraba a.

“Nan yon moman difisil nan istwa peyi nou kote chak grenn Ayisyen ap mande chak jou kote peyia sa pwale, “NOU DWE VIV” ,yon òganizasyon sosyo-politik, pa sispann charye ansanm revandikasyon mas la epi ap batay pou yon pi bon kondisyon lavi pou chak grenn Ayisyen”, yon ti kout je nan nòt sila a.

Yon lòt bò, estrikti politik sa a ap esplike : “11 septanm, aprè 2 mwa yo te fin sasinen prezidan defakto Jovenel Moise, NOU DWE VIV te jije l bon pou bay peyi a yon nouvo altènativ, se nan sans sa nou te siyen akò 11 septanm nan”.

Men aprè yon lane, estrikti politik sa a ap di l konstate pa gen youn nan sa yo te pale yo ki janm respekte tankou : Konferans nasyonal, pwosè petwokaribe, pwosè dèmalòg, pwosè Mèt Dorval, pwosè masak yo, sekirite, elatriye.

Ta sanble estrikti sa a pa fèmen je l sou pwoblèm grangou ak razè k ap brase bil peyi a. “Lè n konsidere n ap bezwen 165 goud pou yon dola, lè nou konsidere n ap bezwen anviwon 700 dola pou yon sak diri, lè nou konsidere popilasyon gran sid la toujou gen gwo difikilte pou travèse Matisan, lè nou konsidere Ariel Henry pa gen okenn volonte pou aplike akò 11 septanm lan, lè nou konsidere majorite estrikti kite siyen akò sa deklare l kadik; aprè anpil refleksyon estaf k ap dirije NOU DWE VIV la deside kite akò a epi deklare l kadik tou”, se sa ki ekri nan yon pati nan nòt pou laprès sila a.

Pou kontinye, estrikti politik “Nou dwe viv” deklare nan sans sa l ap mande “tout aktè nan vi nasyonal la pou yo mete tèt yo ansanm pou bay peyi a yn lòt altènativ kredib ki kapab ede n soti nan twou kote n ye a”.

Boutofen, “Nou Dwe Viv” di li bat yon gwo bravo pou SDP (Sektè Demokratik ak Popilè) ki te deside trase wout kadisite akò PHTK twazyèm vèsyon an pou li pandan l deklare “Nou Dwe Viv” ap toujou rete yon alye SDP nan batay la.

Pi lwen, nan nòt sa a ki pote siyati Samuel Duvers ak Guerrier Ezeckiel; “Nou Dwe Viv” di li “mande tout tèt depon yo pou yo toujou rete solidè youn ak lòt paske se kounye a ki pwal gen batay”.

Bernado TINTIN

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook