Hamilton FRANCOIS

Nan yon nòt tout louvri li voye bay Premye Mins Ariel Henry, Estrikti politik ki rele tèt li Fwon Revolisyonè pou Oganize Nasyon an (FRON) reklame demisyon PM pou yon ti bout tan an nan 48 è de tan aprè piblikasyon nòt sa a. Paske daprè FRON, Ariel Henry se kriminèl, bouwo defen ansyen prezidan Jovenl Moïse ki dwe mete l prè pou li reponn kesyon lajistis nan lide pou limyè fèt sou asasina ansyen nèg bannann nan.

Nan nòt li a, FRON voye yon pinga bay tout moun li di ki aksepte al foure kò yo nan gouvènman chanpwèl PM defakto a ap prepare l pou l mete nan tèt leta peyi a.

Estrikti bay tèt li non FRON an di l aprann mannèv ak mannigans kaka chat dèyè bwèt k ap fèt ant chèf gouvènman an ak akolit li yo pou revoke yon pakèt moun nan gouvènman sa a pou l ranplase yo ak moun pa l nan lide pou l pi byen separe gato a ak zanmi konkonbwèt li yo. Pami moun sa yo, FRON site sekretè jeneral palè nasyonal la, minis yo, sekretè jeneral yo, direktè jeneral lapolis e meme jeneral ki nan tèt lame a. Fwon Revolisyonè al pi lwen pou l di doktè Ariel se byen konte mal kalkile, paske daprè sa yo di, depi apati de moman nòt sa pibliye, yo pa konnen egzistans PM nan nan tèt laprimati ankò e sitou yo pa rekonèt lèt revokasyon kèk fonksyonè tankou ansyen komisè gouvènman Pòtoprens lan Mèt Bed-Ford CLAUDE ak ansyen minis jistis la Mèt Rockfeller VINCENT.

Fwon Revolisyonè pou Oganize Nasyon an (FRON) raple pèp ayisyen ke Josué PIERRE-LOUS ki se nouvo sekretè konsèy mins lan se bòfrè Jhon Joël JOSEPH, ki se, daprè pawòl estrikti a, youn nan moun ki planifye lanmò Jovenel Moïse yo. Sa ki ta vle di, Josué PIERRE LOUIS AK ariel Henry se kòkòt ak figawo, kabrit tomazo menm plim menm plimay, pase pran m mwen pase chache w.

Manm estrikti sila a pa mete dlo nan bouch yo pou yo denonse atitid Ariel Henry pou jan, selon sa yo di, Ariel kite tonton SAM demounize, imilye, maltrete, pouse do, tankou bann kabrit ki lage nan jaden moun, frè ak sè nou yo sou fwontyè Etazini gen pou li ak Meksik la. FRON di sa a se konpòtman restavèk.

FRON fini nòt li a ak yon gwo ponyen lanmen li bay pwotektè sitwayen an Mèt Renan HEDOUVILLE pou jan l pouse Ofis Pwoteksyon sitwayen an pwononse li sou dosye asasina ansyen prezidan an li defans nan dènye degre lè l egzije demisyon san kondisyon Doktè Ariel nan tèt peyi a kòm premye minis pou l mete l prè pou l reponn kesyon lajistis.

Pou estrikti sila a, moun ki siyen nòt sa a se : Jezilòm Franck SYLVAIN, prezidan, Rose-Marie PAILLANT, sekretè jeneral ak William TOUSSAINT, Pòt pawòl.

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook