Aprè demisyon Joseph Jouthe kòm Premye minis, Prezidan Jovenel Moïse te pran Claude Joseph pou ranplase l’ pou yon ti bout tan nan primati a. Kòm se pou kèk jou mouche Claude te la, Apredye vin nome Ariel Henry pou te pran rèy gouvènman an, kèk jou aprè Jojo vin mouri, sa ki te lage gwo bouch louvri ant premye minis nome a ak Claude Joseph kiyès ki pou premye minis. Ebyen mouche blan pwononsel, konpè Claude rale kò li bay doktè Ariel plas la.

Depi avan mouche Ariel Henry moute sou twón li, li te ap defann tèt li ak anpil gwo agiman ki ta gen ti awogans ladan yo tankou ” Claude Joseph pa premye minis paske li fè pati gouvènman mwen an” e sa vin konfime kote Claude rete minis afè etranjè. Apre entèvansyon li sou radyo Scoop FM nan emisyon “Haïti Débat”, mouche a ap repete kèk pawòl nonm ki te vin avan li “Joseph Jouthe”, nou ta ka rele li yon Jouthe amelyore.

Sa ki sanble ant Joseph Jouthe ak Ariel Henry
Depi avan Joseph Jouthe te monte kòm premye minis, peyi a tap kwoupi anba zak malonèt tout plim tout plimay, ensekirite, grangou, fènwè, koripsyon elatriye. Ebyen mouche a te pwomèt pou rezoud pwoblèm sa yo.

Sou zafè ensekirite a, nou tout konnen Matisan se zòn wouj, Ti Bwa, Gran ravin, Vilaj de Dye elatriye, ebyen mesye Jouthe te mande pou mete lapè nan zòn sa yo e li te pwomèt sa ap reyalize paske li bezwen ale danse Tonymix, li bezwen ale jwe Basket Vilaj de Dye.

Mouche Jouthe te di tou bandi rele li nan telefòn e ke li konn pale ak yo pandan li t ap mande yo pou depoze zam yo paske se swa yo remèt li oubyen yo mouri.

Sou zafè grangou an, anpil pwogram sosyal te pwomèt pou mete sou pye pou pèp la kapab rale yon souf. Men kèk tan apre tout moun te prèske pè paske se bandi yo ki t ap simen latwoublay pandan yo t ap kidnape moun tout kote.

“Yon chèf pa yon jwèt” ala de ka papa.

Pou nou rive sou Premye Minis Ariel Henry, li senpleman vin repete sa Joseph Jouthe te di yo san li pa mete twòp awogans. Doktè Ariel fè konnen ke li gen 2 bandi ki te rele li pou te negosye pòs nan pouvwa, li te di yo li p ap dirije ak bandi.

Nan deklarasyon li sou antèn Scoop FM, Ariel pwomèt pou mete lapè nan Matisan ak lòt zòn kote bandi yo ap taye banda e di tou fòk lapolis la ekipe pou fè travay la pandan lap tou mete lapè pou eleksyon kapab fèt pou konble pòs vid nan leta yo. Ou kwè se vre!

Sou zafè grangou a, li fè konnen tou ke li pral mete pwogram sosyal pou pèp la ka respire. “Pèp la grangou, grangou a rèd deyò” pawòl Ariel sou Scoop. Li ta fè nou konprann ke pèp grangou paka vote paske dwe gen yon klima lapè nan tout sans ki pou fè peyi a pa debouche sou lòt kriz apre eleksyon.

Apre anpil lòt pawòl premye minis Ariel di e sa Jouthe te di, nou konkli ke Ayiti pran nan yon Joseph Jouthe dezyèm vèsyon. Yon Joseph Jouthe ki te vle gen otorite men ki te echwe lakòz ipokrizi nan Primati ak palè Nasyonal. N’ap tou raple ke Reynald Lubérice mennen konba kont 2 moun sa yo.

Jean Mary Ludy Barbson

Aidez-nous en partageant l'article ! Sipote nou, pataje atik la ak tout moun!

Laisser un commentaire

Votre adresse e-mail ne sera pas publiée.

Facebook